O OUTONO

Dende o 23 de setembro, o grupo 1 estivemos a traballar o outono e, como somos moi larpeiros, non puidemos obviar os alimentos característicos desta estación. Por iso, hai dúas semanas fomos recoller castañas, noces e mazás cos compañeiros a unha finca dentro do recinto do cole. E como todo esforzo ten a súa recompensa, hai pouco fixemos unha degustación dalgúns dos froitos do outono e descubrimos que a Carlota e Yago encántanlles as uvas, a Hugo as noces e a Uxía as castañas asadas. Mmm... non deixamos nin as migallas! E ademais aproveitamos para traballar hábitos tan importantes como poñer e recoller a mesa ou a hixiene persoal.